曼城喺英超作客般尼茅夫失分，眼白白睇住阿仙奴奪冠，但領隊哥迪奧拿心服口服，恭賀對方捧盃，並大讚兵工廠今季表現值得贏冠軍。

阿仙奴主帥阿迪達曾經喺曼城擔任哥迪奧拿副手，哥帥對於呢位「弟子」青出於藍，感到欣慰，佢話：「恭喜阿仙奴奪冠，仲有阿迪達，兵工廠球員、職員、球迷所有人，你哋捧盃係實至名歸，好好享受呢一刻，跟住準備歐聯決賽，我哋下季會捲土重來。」曼城繼上季英超獲得季軍後，今季屈居亞軍，哥迪奧拿教波生涯首次連續2季失落聯賽錦標。

近日盛傳哥迪奧拿已決定今季完結後離隊，呢位55歲西班牙名帥唔否認亦唔承認，佢話：「我仲有1年合約，唔會喺呢度講你知答案，因為我必須同球會主席等管理層、球員、工作人員先討論一下。」今場比賽過程中，有唔少曼城球迷高呼哥迪奧拿執教多1季，唔知佢會唔會考慮呢？

足球博彩神器，每日重心提供盡在《彩報》：http://win.on.cc/football/